دعونا نستعرض بعضاً من أشعار نضال الحاج :
هيا .. حورية المطرة!!
نضال حسن الحاج
مخير الله.. لا شالت مطرة الخير ولا من الوجع صبت
ولا كتل الضلام حسك ولا ريح الكلام هبت
محل ما تنورق الحمى ومحل حيل الصبر ما انبت
محل تبدأ القصيدة البوح تكون بت القصيدة أبت
شهور والجتة فاقدة الروح تساسق بين ظنون الموت
وموجوع البحر ساكت بحنس لا لسان لا صوت
خبارو وكت رقد فرحك ممدد في الغنا ومختوت
ولا غنيتي للجاتك
ولا عزيتي في الفاتك
خبارك يعني عاد لامتين تحنسي في السكات ينضم
عشان يترجا كم أستاذ بعد كتبنو الفاتك
خبارك لونك اتدفق على وجع النحيب تابوت
خبارك لا لسان لا صوت
مواويل تايهة
لا ارتاحت خطاك لا جفت الأحزان ولا ربت على كتفك جناك لا جاك
خبارك صاحية آخر الليل ومالو الليل دا ما حجاك
ومالو أكان براح الكون مرق من فجتو وفجاك
خبارك ضايقة في وشك وساعات الفضا الفايقة
وخبارك ضقتي ما قبال أكان الدنيا جت بتجيك وكت تشكي وتكون ضايقة
خبارك ساكتة لا بتنوحي لا بتبوحي
لا بتوحي لا بتزحي
مالك ويعرفولك كيف وصمتك ساوا ليكي حجاب وبيهو الناس تقول رايقة
وقميص الروح وخيل الهم دا هسي لحدي وين سايقة؟
خلاص اتمدد الأذان
خلاص شبع القلب أحزان
أمرقي عشان ولاد الغنوة ماتوا جاعوا وشبعوا وجعة وذل
أمرقي عشان تجي القمرة وعشان يغشى النهارات ضل
أمرقي عسى القصيده تجي وعسى الجوع الهرد كبدة سنيني العجفا يلقى تكل
أمرقي ومدي إيد الحن وقول لي ها الجفا المالك مفاتيح قولنا هاكا أكل
ولا كلت ولا ملت
ولا مرقت ولا قالت
ولا بين البيوت فلت
ولا بن ناسا اتعالت
ولا رغم النويح طلت
ولا ختت ولا شالت
ولا فرحة هواك طلت
ولا دمعة شقاك سالت
ولا زالت
حزن منشري ضد النيل
تسابق في نهار الناس عشان تستر فجايع الليل
وجع هد الجبال ورجع رجاك فتران وفاقد الحيل
مكلفة تدي إنتي مروة خابر كم وجايعك سيل
ها ما تندسي في حزنك
ولا ترجي المطر ينزل قبل تدي البحر إذنك
ولا قدرك غناك المر ولا بتحمل الألم التقيل وزنك
ولا بتدي الكضب أذنك
هيا حورية المطرة
هديك الدنيا واقفالك
أمانة ولوعتا وخطره
بطون الأمة بي بطرة
عليك الله القلوب الناس على الدين القويم فطره
أمرقي وبشري الأمات
زغاريد الوجع مرقن وكت شافع سعادتك مات
حريم شدر الحراز رجن الخريف بي ضحكة منلمات
وراجنك
قبل ما تفوتي كانوا الناس بموتوا محبة في حنك
هديل نسوة مدينة الروح مع امرأة العزيز جنك
بعزنك على إنك مرقتي من السعادة ضحى ومرق وجع الوطن منك
ولدتي بعد فجيعة وخوف
ظروفك ماها أي ظروف
وقف حال الزمن جريتي بيك جيب الفراغ مسروف
نهز قدرك قفاك ورضيتي يعني عشان أساك معروف
قنعتي من السمع والجتة من نبض الحنين والجوف؟
ها مالك ومال بنات الدمعة والألم البمرض الجوف
ومالك ومال خلايق راقدة في جلباب عشم مكفوف
ومالك ومال حنينك إنتي؟
ما قبال شحدنا القمرة تطلعي منها وما بنتي
مالو كنّا نحن ضحكنا لحظة وجعة ما كان بنتي
لو عمر الفرح أوجاعنا ما كان في قلوبنا سكنتي
يا حورية المطرة الهلاكك عند أجاويدك
خبارك راكزة للرمضا وهدا الضل كلو فوق إيدك
خبارك لا وجع هزاك ولا حز الزمن جيدك
ولا كحل العمى عيونك ولا انكسرن مراويدك
ولا شفعولك الرادوك وكل الدنيا بتريدك
هيا حورية المطرة!!
